قلم الناس
هو وعد قطعته على نفسي بأني نبقى نحاول نشر مستجدات قضيتنا الوطنية، بلغة دارجة بسيطة باش ناس تفهم ما يجري لأن الامر يتعلق بوجودنا لأن معركتنا في سبيل القصاء على الانفصال وبكل بساطة معركة ان نكون او لا نكون
والمغرب كان و سيكون الى ان يرث الله الارض سبحانه وتعالى
اذن نبداو ونقولو بسم الله :

*علاش روسيا مشات للجمعية العامة؟ وشنو وقع مور الفيتو؟*

ملي روسيا استعملات الفيتو فمجلس الأمن، ما بقاتش ليها غير ورقة وحدة: تمشي للجمعية العامة وتدير شوية ديال الصداع السياسي.

وهادشي كيسمحو بيه القرار 76/262، اللي كيقول: أي دولة دارت فيتو، خاص الجمعية العامة تناقشو قدام 193 دولة.

وفعلا، طلعات نائبة المندوب الروسي، آنا أوستيجنيفا، للمنبر، وبدات كتبرر الفيتو ديال بلادها، وكتنتقد أمريكا حيت هي بوحدها اللي كتوجد القرارات ديال الصحراء، وهادشي اللي كيسميوه “حامل القلم”.

روسيا بغات تعطي لراسها صورة ديال المدافع على الدول الصغيرة ضد الغرب، بحال أيام حركة عدم الانحياز، باش ما تبانش هي اللي واقفة ضد الحل.

*ولكن فالقانون، هادشي كيساوي والو*

الجمعية العامة كتهضر، ولكن ما كتحكمش. ما عندهاش الحق تفرض قرارات بحال مجلس الأمن. كلامها كيبقى غير توصيات.

وأكبر دليل: هاد الهضرة كاملة ما قدراتش توقف ولو ساعة وحدة المسطرة ديال الأمم المتحدة، اللي بدات من 1 نونبر كتجمع البعثة ديال المينورسو وكتخرجها من الصحراء المغربية.

*وهنا كتبان البصمة ديال سيدنا الله ينصرو*

هاد النتيجة ما جاتش بالصدفة. جات بفضل الرؤية ديال جلالة الملك محمد السادس نصره الله.

سيدنا قالها مرارا فالخطب الملكية، وبالواضح: السيادة ما فيهاش تفاوض، والصحراء مغربية قبل كلشي، والحل الوحيد هو الحكم الذاتي تحت السيادة المغربية الكاملة.

وقالها سيدنا: “مغربية الصحراء حقيقة راسخة”، و “المغرب لن يتنازل عن شبر واحد من صحرائه”.

وبفضل هاد التوجه الملكي الحكيم، المغرب بدل اللعبة كاملة: ما بقاش كيدافع، ولى كيفرض الواقع. اللي بغا يتعامل مع المغرب، خاصو يعترف بمغربية الصحراء، واللي ما بغاش،
المغرب ما كيتسناهش.
وقالها سيدنا فواحد الخطاب اتسم بالصرامة يوم صرح جنابه الشريف بأن الصحراء هي النظارت لي كيشوف المغرب بها العالم

وبهاد الدبلوماسية الملكية الهادئة والذكية، قدر المغرب فهاد الأيام الأخيرة، يحيد المينورسو من أقاليمه الجنوبية، بلا
.حرب، بلا فوضى، بالقانون وبالسيادة
قالاخير لابد باش نشير الى نقطة مهمة وهي اني من المؤيدين لبقاء التدبير الخارجي الاستراتيجي مجالا محفوظ للملكية، لأن عندها من الخبرات و الامكانيات ناهيك عن الافق الاستراتيجي، ما كيسمحلها تدبرو بعقلانية و بما فيه صالح المغرب
والنتائج لي حققها المغرب مؤخرا خير دليل
لمن القى السمع بقلب سليم
سلم مغربنا ياربي من مكر كل من يبغي به سوء.

روسيا غير كتحاول تغطي على الضعف ديالها فمجلس الأمن، حيت غير جوج دول اللي وقفو معاها: الصين والصومال.

وأما الميدان، فالقصة سالات: الصحراء كيديرها المغرب بيديه، وبتوجيهات من الملك.

*